Latest Event Updates

முதல்வன் முறையீடு

Posted on


கன்னி வனநாதா – கன்னி வனநாதா

1. மூலம் அறியேன்: முடியும் முடிவறியேன்
ஞாலத்துள் பட்டதுயர் நாட நடக்குதடா!

2. அறியாமை யாம்மலத்தால் அறிவுமுதல் கெட்டனடா!
பிறியா வினைப்பயனால் பித்துப் பிடித்தனடா!

3. தனுவாதிய நான்கும் தானாய் மயங்கினண்டா!
மனுவாதி சத்தி வலையில் அகப்பட்டனடா!

4. மாமாயை என்னும் வனத்தில் அலைகிறண்டா!
தாமாய் உலகனைத்தும் தாது கலங்கிறண்டா!
(கன்னி வனநாதா! கன்னி வனநாதா)

5. மண்ணாசைப் பட்டேனை மண்ணுண்டு போட்டதடா!
பொன்னாசை பெண்ணாசை போகேனே என்குதே.

6. மக்கள் சுற்றத் தாசை மறக்கேனே என்குதே:
திக்கரசாம் ஆசையது தீரேனே என்குதே.

7. வித்தை கற்கும் ஆசையது விட்டொழியேன் என்குதே:
சித்துகற்கும் ஆசை சிதையேனே என்குதே:

8. மந்திரத்தில் ஆசை மறக்கேனே என்குதே:
சுந்தரத்தில் ஆசை துறக்கேனே என்குதே.

9. கட்டுவர்க்கத்து ஆசை கழலேனே என்குதே:
செட்டுதனில் ஆசை சிதையேனே என்குதே:

10. மாற்றும் சலவை மறக்கேனே என்குதே:
சோற்றுக் குழியும் இன்னம் தூரேனே என்குதே.
(கன்னி வனநாதா! கன்னி வனநாதா!)

11. ஐந்து புலனும் அடங்கேனே என்குதே:
சிந்தை தவிக்கிறதும் தேறேனே என்குதே.

12. காமக் குரோதம் கடக்கேனே என்குதே:
நாமே அரசென்று நாள்தோறும் எண்ணுதே

13. அச்சம் ஆங்காரம் அடங்கேனே என்குதே:
கைச்சும் இன்னுமானங் கழலேனே என்குதே:

14. நீர்க்குமிழி ஆம்உடலை நித்தியமாய் எண்ணுதே!
ஆர்க்கும் உயராசை அழியேனே என்குதே.

15. கண்ணுக்குக் கண்ணெதிரே கட்டையில் வேகக்கண்டும்
எண்ணும் திரமாய் இருப்போம் என்றெண்ணுதே.

16. அநித்தியத்தை நித்தியம் என்றாதவராய் எண்ணுதே
தனித்திருக்கேன் என்குதே தனை மறக்கேன் என்குதே.

17. நரகக் குழியும் இன்னும் நான் புசிப்பேன் என்குதே.
உரகப் படத்தல்குல் உனைக் கெடுப்பேன் என்குதே.

18. குரும்பை முலையும் குடிகெடுப்பேனே என்குதே.
அரும்பு விழியும் என்றன் ஆவி உண்பேன் என்குதே.

19. மாதர் உருக் கொண்டு மறலி வஞ்சம் எண்ணுதே.
ஆதரவும் அற்று இங்கு அரக்காய உருகிறண்டா!

20. கந்தனை ஈன்றருளுங் கன்னி வனநாதா!
எந்த விதத்தில் நான் ஏறிப் படருவண்டா!
(கன்னி வனநாதா! கன்னி வனநாதா!)

21. புல்லாகிப் பூடாய்ப் புலந்தநாள் போதாதோ?
கல்லாய் மரமாய்க் கழிந்தநாள் போதாதோ?

22. கீரியாய்க் கீடமாய்க் கெட்டநாள் போதாதோ?
நீரியாய் ஊர்வனவாய் நின்றநாள் போதாதோ?

23. பூதமொடு தேவருமாய்ப் போனநாள் போதாதோ?
வேதனை செய் தானவராய் வீந்தநாள் போதாதோ?

24.அன்னை வயிற்றில் அழிந்தநாள் போதாதோ?
மன்னவனாய் வாழ்ந்து மரித்தநாள் போதாதோ?

25. தாயாகித் தாரமாய்த் தாழ்ந்தநாள் போதாதோ?
சேயாய்ப் புருடனுமாய்ச் சென்றநாள் போதாதோ?

26. நோய்உண்ண வேமெலிந்து நொந்தநாள் போதாதோ?
பேய்உண்ணப் பேயாய்ப் பிறந்தநாள் போதாதோ?

27. ஊனவுடல் கூன்குருடாய் உற்றநாள் போதாதோ?
ஈனப் புசிப்பில் இளைத்தநாள் போதாதோ?

28. பட்டகளையும் பரதவிப்பும் போதாதோ?
கெட்டநாள் கெட்டேன் என்று கேளாதும் போதாதோ?

29. நில்லாமைக்கே அழுது நின்றநாள் போதாதோ?
எல்லாரும் என்பாராம் எடுத்தநாள் போதாதோ?

30. காமன் கணையால் கடைபட்டல் போதாதோ?
ஏமன் கரத்தால் இடியுண்டல் போதாதோ?

31.நான்முகன் பட்டோலை நறுக்குண்டல் போதாதோ?
தேன் துளபத்தான் நேமி தேக்குண்டல் போதாதோ?

32. உருத்திரனார் சங்காரத்து உற்றநாள் போதாதோ?
வருத்தம் அறிந்தையிலை! வாவென்று அழைத்தையிலை!
(கன்னி வனநாதா! கன்னி வனநாதா!)

33. பிறப்பைத் தவிர்த்தயிலை. பின்னாகக் கொண்டையிலை:
இறப்பைத் தவிர்த்தையிலை. என்னென்று கேட்டையிலை.

34. பாசம் எரித்தையிலை: பரதவிப்பைத் தீர்த்தையிலை:
பூசிய நீற்றைப் புனைஎன்று அளித்தையிலை:

35. அடிமை என்று சொன்னையிலை: அக்கமணி சந்தையிலை:
விடும் உலகம் நோக்கி உன்றன் வேடம் அளித்தையிலை:

36. உன்னில் அழைத்தயிலை: ஒன்றாகிக் கொண்டையிலை:
நின் அடியார் கூட்டத்தில் நீ அழைத்து வைத்தையிலை:

37. ஓங்கும் பரத்துள் ஒளித்த அடியார்க்கு அடியான்
ஈங்கோர் அடியான் எமக்கென்று உரைத்தையிலை.

38. நாமம் தரித்தையிலை: நான் ஒழிய நின்றையிலை:
சேம அருளில் எனைச் சந்தித்து அழைத்தையிலை:

39. முத்தி அளித்தையிலை: மோனம் கொடுத்தையிலை:
சித்தி அளித்தையிலை: சீராட்டிக் கொண்டையிலை.

40. தவிப்பைத் தவிர்த்தையிலை: தானாக்கிக் கொண்டையிலை:
அவிப்பரிய தீயாம்என ஆசை தவிர்த்தையிலை.

41. நின்ற நிலையில் நிறுத்தி எனை வைத்தையிலை:
துன்றங் கரண மொடு தொக்கழியப் பார்த்தையிலை:

42. கட்ட உல கக்காட்சிக் கட்டொழியப் பார்த்தையிலை:
நிட்டையிலே நில் என்று நீ நிறுத்திக் கொண்டையிலை.
(கன்னி வனநாதா! கன்னி வனநாதா)

43. கடைக்கண் அருள் தாடா! கன்னி வனநாதா!
கெடுக்கும் மலம் ஒறுக்கிக் கிட்டிவரப் பாரேடா!

44. காதல் தணியேனா! கண்டு மகிழேனோ!
சாதல் தவிரேனோ! சங்கடம் தான் தீரேனோ!

45. உன்னைத் துதியேனோ! ஊர்நாடி வாரேனோ!
பொன் அடியைப் பாரேனோ! பூரித்து நில்லேலேனா!

46. ஓங்காரப் பொன் சிலம்பின் உல்லாசம் பாரேனோ!
பாங்கான தண்டை பலமணியும் பாரேனோ!

47. வீரகண்டா மணியின் வெற்றிதனைப் பாரேனோ!
சூரர் கண்டு போற்றும் அந்த சுந்தரத்தைப் பாரேனோ!

48. இடையில் புலித்தோல் இருந்தநலம் பாரேனோ!
விடையில் எழுந்தருளும் வெற்றியினைப் பாரேனோ!

49. ஆனை உரிபோர்த்த அழுகுதனைப் பாரேனோ!
மானைப் பிடித்து ஏந்தும் மலர்க்கரத்தைப் பாரேனோ!

50. மாண்டார் தலைபூண்ட மார்பழகைப் பாரேனோ!
ஆண்டார் நமக்கென்று அறைந்து திரியேனா!

51. கண்டம் கறுத்துநின்ற காரணத்தைப் பாரேனோ!
தொண்டார் குழுவில் நின்ற தோற்றமதைப் பாரேனோ!

52. அருள் பழுத்த மாமதியாம் மான் அனத்தைப் பாரேனோ!
திருநயனச் சடை ஒளிரும் செழுங்கொழுமை பாரேனோ!

53. செங்குமிழின் துண்டம்வளர் சிங்காரம் பாரேனோ!
அங்கனியை வென்ற அதரத்தைப் பாரேனோ!

54. முல்லை நிலவெறிக்கும் மூரல்ஒளி பாரேனோ!
அல்லார் புருவத்து அழகுதனைப் பாரேனோ!

55. மகரம் கிடந்தொளிரும் வண்மைதனைப் பாரேனோ!
சிகர முடி அழகும் செஞ்சடையும் பாரேனோ!

56. கங்கையொடு திங்கள் நின்ற காட்சிதனைப் பாரேனோ!
பொங்கு அரவைத் தான் சடையில் பூண்ட விதம் பாரேனோ!

57. சரக்கொன்றை பூத்த சடைக்காட்டைப் பாரேனோ!
எருக்கறு கூமத்தை அணி ஏகாந்தம் பாரேனோ!

58. கொக்கிற்கு சூடிநின்று கொண்டாட்டம் பாரேனோ!
அக்கினியை ஏந்திநின்ற ஆனந்தம் பாரேனோ!

59. தூக்கிய காலும் துடி இடையும் பாரேனோ!
தாக்கும் முயலகன் மேல் தாண்டவத்தைப் பாரேனோ!

60. வீசும் கரமும் விகசிதமும் பாரேனோ!
ஆசை அளிக்கும் அபயகரம் பாரேனோ!

61. அரிபிரமர் போற்ற அமரர் சயசயெனப்
பெரியம்மை பாகம் வளர் பேரழகைப் பாரேனோ!

62. சுந்தர நீற்றின் சொகுசுதனைப் பாரேனோ!
சந்திர சேகரனாய்த் தயவு செய்தல் பாரேனோ!
(கன்னி வனநாதா! கன்னி வனநாதா!)

63. கெட்டநாள் கெட்டாலும் கிருபை இனிப் பாரேடா!
பட்டநாள் பட்டாலும் பதம் எனக்குக் கிட்டாதோ!

64. நற்பருவம் ஆக்கும் அந்த நாள் எனக்குக் கிட்டாதோ?
எப்பருவமும் சுழன்ற ஏகாந்தம் கிட்டாதோ?

65. வாக்கிறந்து நின்ற மவுனமது கிட்டாதோ?
தாக்கிறந்து நிற்கும் அந்தத் தற்சுத்தி கிட்டாதோ?

66. வெந்துயரைத் தீர்க்கும் அந்த வெட்ட வெளி கிட்டாதோ?
சிந்தையையும் தீர்க்கும் அந்தத் தேறலது கிட்டாதோ?

67. ஆன அடியார்க்கு அடிமை கொளக் கிட்டாதோ?
ஊனம் அற என்னை உணர்த்து வித்தல் கிட்டாதோ?

68. என்னென்று சொல்லுவண்டோ? என்குருவே! கேளேடா!
பின்னை எனக்குநீ யல்லாமல் பிறிதிலையே.
(கன்னி வனநாதா!-கன்னி வனநாதா!)

69. அன்ன விசாரமது அற்ற  இடம் கிட்டாதோ?
சொர்ண விசாரம் தொலைந்த இடம் கிட்டாதோ?

70. உலக விசாரம் ஒழிந்த இடம் கிட்டாதோ?
மலக்குழுவின் மின்னார் வசியாதும் கிட்டாதோ?

71. ஒப்புவமை பற்றொடு ஒழிந்த இடம் கிட்டாதோ?
செப்புதற்கும் எட்டா தெளிந்த இடம் கிட்டாதோ?

72. வாக்கு மனாதீத வகோசரத்தில் செல்ல எனைத்
தாக்கும் அருள்குருவே! நின் தாள் இணைக்கே யான் போற்றி!

Advertisements

நந்திகேஸ்வரர் போற்றி

Posted on Updated on

ஓம் அன்பின் வடிவே போற்றி
ஓம் அறத்தின் உருவே போற்றி
ஓம் அகிலத்தைக் காப்பாய் போற்றி
ஓம் அரனுக்குக் காவலனே போற்றி
ஓம் அரியாய்வந்து அமர்ந்தவனே போற்றி
ஓம் அம்பலக் கூத்தனே போற்றி
ஓம் ஆலயத்தின் முன் இருப்பாய் போற்றி
ஓம் இருளை ஒழிப்பவனே போற்றி
ஓம் இடபமே போற்றி
ஓம் இடர்களைத் தடுப்பவனே போற்றி

ஓம் இகாபரசுகம் அளிப்பவனே போற்றி
ஓம் ஈகை உடையவனே போற்றி
ஓம் உலக ரட்சகனே போற்றி
ஓம் உபதேச காரணனே போற்றி
ஓம் ஊக்க முடையவனே போற்றி
ஓம் எருது உருவம் கொண்டவனே போற்றி
ஓம் எங்களுக்கு வரம் தருபவனே போற்றி
ஓம் ஏவல்களை ஒழித்தவனே போற்றி
ஓம் ஐயன் பால் அமர்ந்த வனே போற்றி
ஓம் ஒப்பில்லாதவனே போற்றி

ஓம் ஓங்கார வடிவானவனே போற்றி
ஓம் ஒளடதமாய் இருப்பவனே போற்றி
ஓம் கணநாயகனே போற்றி
ஓம் கஷ்டங்களைப் போக்குவாய் போற்றி
ஓம் கல்யாண மங்களமே போற்றி
ஓம் கலைகள் பலதெரிந்தோய் போற்றி
ஓம் கற்பகத் தருநிழல் அமர்ந்தாய் போற்றி
ஓம் கஸ்தூரி நிறம் ஒளி அணிந்தாய் போற்றி
ஓம் கவலைகளை ஒழிக்கும் வல்லவனே போற்றி
ஓம் காலனுக்கும் காவலனே போற்றி

ஓம் கிரிவல்லயன் துணையே போற்றி
ஓம் கீர்த்திகள் பல பெற்றாய் போற்றி
ஓம் குணநிதியே போற்றி
ஓம் குற்றம் களைவாய் போற்றி
ஓம் கூத்தனுக்கு மத்தளம் அடித்தாய் போற்றி
ஓம் கோலங்கள் பல செய்வாய் போற்றி
ஓம் கைலாச வாகனனே போற்றி
ஓம் கந்தனைக் கையால் அமர்த்தினாய் போற்றி
ஓம் காலமெல்லாம் ஈசன் சிந்தனையே போற்றி
ஓம் பஞ்சாக்ஷர ஜெபம் செய்பவனே போற்றி

ஓம் பஞ்சலிங்கத்தில் ஒருவன் ஆனாய் போற்றி
ஓம் பரமசிவன் தன்மை தெரிந்தோய் போற்றி
ஓம் பார்வதிக்கும் வாகனமாய் நின்றாய் போற்றி
ஓம் பிரதோஷ காலம் உடையவனே போற்றி
ஓம் பிறவிப் பிணி தீர்ப்பாய் போற்றி
ஓம் பிஞ்ஞகன் ஏவல் செய்வாய் போற்றி
ஓம் புகழ்கள் பல பெற்றோய் போற்றி
ஓம் பூத கணங்களுக்குத் தலைவனே போற்றி
ஓம் பூத பிசாசுகளை அடக்குவாய் போற்றி
ஓம் மகாதேவனே போற்றி

ஓம் மகிமை பல செய்வாய் போற்றி
ஓம் மஹேஸ்வரன் தூதனே போற்றி
ஓம் மங்கள நாயகனே போற்றி
ஓம் மதோன் மத்தம் தடுப்பாய் போற்றி
ஓம் மஞ்சள் மகிமை கொடுப்பாய் போற்றி
ஓம் மணங்கள் செய்காரணனே போற்றி
ஓம் மந்திர மகிமை உனக்கே போற்றி
ஓம் அகிலமெல்லாம் உன் அருள் போற்றி
ஓம் தட்சனுக்கு உபதேசம் செய்தாய் போற்றி
ஓம் தண்டங்களின் மேல் அமர்ந்தாய் போற்றி

ஓம் தன்மை களெல்லாம் அறிந்தோய் போற்றி
ஓம் தயாபரன் அருள் பெற்றவனே போற்றி
ஓம் தஞ்ச மென்றவர்க்கருள் செய்வாய் போற்றி
ஓம் நஞ்சுண்டவனை நாயகனாய் அடைந்தாய் போற்றி
ஓம் நாக நந்தனின் நயனம் தெறிந்தவனே போற்றி
ஓம் நாதமும் பிந்துவும் ஆனாய் போற்றி
ஓம் பழமும் சுவையும் நீயே போற்றி
ஓம் பண்புகள் பல செய்வாய் போற்றி
ஓம் பாரெல்லாம் உன்புகழ் போற்றி
ஓம் பிறவிப் பிணி அறுப்பாய் போற்றி

ஓம் அடியவர்க்கெல்லாம் அன்பே போற்றி
ஓம் ஆண்டவனிடம் அன்பு கொண்டாய் போற்றி
ஓம் ஆதாரசக்தி மயம் பெற்றாய் போற்றி
ஓம் சிவனின் வாகனம் ஆனாய் போற்றி
ஓம் இன்னல் தீர்க்கும் இறைவனே போற்றி
ஓம் நீண்ட கொம்புடையவனே போற்றி
ஓம் நீலாயதாட்சி அருள் பெற்றாய் போற்றி
ஓம் நீலகண்டன் முன் நின்றாய் போற்றி
ஓம் வேதங்களை காலாய் உடையவனே போற்றி
ஓம் வேள்விக்குத் தலைவனே போற்றி

ஓம் வித்யா காரணனே போற்றி
ஓம் விவேகம் எனக்குத் தருவாய் போற்றி
ஓம் விண்ணுலகம் செல்லும் வழியே போற்றி
ஓம் வில்வத்தின் மகிமையே போற்றி
ஓம் விஸ்வே உன் வல்லமையே போற்றி
ஓம் வேல்உடையவனே போற்றி
ஓம் மகா காளனே போற்றி
ஓம் மக்கள் பேறு தருவாய் போற்றி
ஓம் மாயைகளை அகற்றுவாய் போற்றி
ஓம் வெள்ளை நிறம் உடையாய் போற்றி

ஓம் உலகம் அறிந்த உத்தமனே போற்றி
ஓம் உன்மகிமை உலகமெல்லாம் போற்றி
ஓம் ஊஞ்சல் ஆட்டுபவனே போற்றி
ஓம் ஊடலுக்குதவியனே போற்றி
ஓம் உபதேசம் பெற்றவனே போற்றி
ஓம் உலகுக்கு அருள்வாய் போற்றி
ஓம் பிழைகள் பொறுப்பாய் போற்றி
ஓம் பிள்ளையார் சோதரனே போற்றி
ஓம் மாயை ஏடுக்கும் மாடாய் நின்றாய் போற்றி
ஓம் மாமன்னநம் உன்பனி செய்வார் போற்றி

ஓம் மகாதேவன் கருணையே போற்றி
ஓம் பரப்பிரம்மமே போற்றி
ஓம் விண்ணோர்க்கு அரிய மருந்தே போற்றி
ஓம் கண்டனின் வாகனமானாய் போற்றி
ஓம் சிவனின் பாதியை சுமந்தாய் போற்றி
ஓம் கையிலையின் காவலனே போற்றி
ஓம் மக்கள் குறைதீர்ப்பாய் போற்றி
ஓம் பிரதோஷ நாயகனே போற்றி போற்றி.

அனுமன் சாலீஸா

Posted on

பாராயண முறை:

உடலைத் தூய்மைப்படுத்திக் கொண்டு, தூய ஆடை அணிந்து, தூய உள்ளத்துடன் ஆஞ்சநேயரைத் தியானிக்க வேண்டும். நெய் விளக்கேற்றி, தூபம் காட்டியபின் பதினொரு முறை இந்த நாற்பது துதிகளையும் அன்புடன் ஓத வேண்டும். நூறு முறை ஓதுவது சிறப்பு. ஒவ்வொரு முறை முடியும் போதும் ஆஞ்சநேயரின் திருப்பாதங்களில் மலர்களைச் சமர்ப்பிக்க வேண்டும். கோயிலிலோ,  வீட்டின் தூய்மையான இடத்தில் ஆஞ்சநேயர் படத்தின் முன்னாலோ பாராயணம் செய்யலாம். செவ்வாய் அல்லது சனிக்கிழமைகளில் பாராயணம் செய்ய வேண்டும். பக்தியுடனும் அன்புடனும் ஹனுமன் சாலீஸா பாராயணம் செய்யப்பட்டால் நினைத்தது நடக்கும் என்பது பெரியோர் கூற்று. அவரது அருளால் எதுவும் நடக்கும் என்பதில் ஐயமில்லை.

ஸ்ரீகுரு சரண் ஸரோஜ்ரஜ் நிஜ மன முகுர ஸுதார் பரணோம் ரகுவர விமல யச ஜோ தாயக பலசார்

எனது மனம் என்னும் கண்ணாடியை ஸ்ரீ குருதேவரின் திருப்பாதத் தூசியால் தூய்மைப் படுத்திக் கொண்டு நான்கு கனிகளைத் தருகின்ற ரகுகுலதிலகமான ஸ்ரீராமனின் மாசற்ற தெய்வீகப் பெருமைகளை விளக்கத் தொடங்குகிறேன்.

நான்கு கனிகள்:

1. அறம்-நல்வழி 2.பொருள்-நல்வழியில் ஈட்டிய செல்வம் 3. இன்பம்-நல்வழியில் நிறைவேற்றப் பெறும் ஆசைகள் 4. வீடு-சம்சார வாழ்விலிருந்து விடுதலை.

புத்தி ஹீன தனு ஜானி கே, ஸுமிரௌ பவன குமார் பல புத்தி வித்யா தேஹு மோஹிம், ஹரஹு கலேச விகார்

எனது அறிவோ குறுகியது, வாயு மைந்தனான ஆஞ்சநேயா, உன்னைத் தியானிக்கிறேன், எனக்கு வலிமை, அறிவு, உண்மை ஞானம் எல்லாம் தருவாய். என்னைத் துன்பங்களிலிருந்தும் தவறுகளிலிருந்தும் விடுவிப்பாய்.

1. ஜய ஹனுமான் ஜ்ஞான குண ஸாகர ஜய கபீஸ திஹுலோக உஜாகர

ஆஞ்சநேயா, நீ கடலைப் போலப் பரந்த அறிவும் நற்குணங்களும் பொருந்தியவன், வானரர்களின் தலைவன் மூன்று உலகங்களையும் உணர்வுற்றெழச் செய்பவன். உனக்கு வெற்றி உண்டாகட்டும்.

2. ராமதூத அதுலித பலதாமா அஞ்ஜனி புத்ர பவன ஸுத நாமா

நீ ஸ்ரீராம தூதன், எல்லையற்ற ஆற்றலின் உறைவிடம், அஞ்ஜனையின் மைந்தன், வாயுபுத்திரன் என்னும் பெயர்பெற்றவன்.

3. மஹாவீர் விக்ரம பஜரங்கீ குமதி நிவார ஸுமதி கே ஸங்கீ

மிகுந்த ஆற்றல் வாய்ந்த உடலுடன் இணையற்ற வலிமை பொருந்திய வீரன் நீ. துய சிந்தனைகளை விரட்டுபவன் நீ. நல்லசிந்தனைகளின் நண்பன் நீ.

4. கஞ்சன பரண விராஜ ஸுவேசா கானன குண்டல குஞ்சித கேசா

பொன்னிறம் பொருந்தியவன் நீ, சிறந்த ஆடைகளை உடுத்தியுள்ளவன் நீ. ஒளி வீசுகின்ற குண்டலங்களையும் காதில் அணிந்துள்ளாய். உனது முடியோ அலையலையாக அழகாக உள்ளது.

5. ஹாத் வஜ்ர ஒள த்வஜா விராஜை காந்தே மூஞ்ஜ ஜனேவூ ஸாஜை

உனது கைகளை இடியும் கொடியும் அலங்கரிக்கின்றன. தோளையோ முஞ்ஜைப் புல்லாலான பூணூல் அணி செய்கிறது.

6. சங்கர ஸுவன கேசரீ நந்தன தேஜ ப்ரதாப மஹா ஜகவந்தன

நீ சிவபெருமானின் அவதாரம், கேசரியின் மகன், உனது தேஜசையும் வீரத்தையும் கண்டு உலகமே உன்னை வணங்குகிறது. அனுமனின் தந்தை கேசரி என்னும் வானரர் தலைவர். சிங்கத்தைப் போன்ற ஆற்றல் உடையவராக இருந்ததால் அவர் கேசரி என்னும் பெயர் பெற்றார். அனுமனின் தெய்வீகத் தந்தை வாயு பகவான்.

7. வித்யாவான் குணீ அதி சாதுர ராம காஜ கரிபே கோ ஆதுர

நீ அறிவாளி, நற்குணங்கள் நிரம்பப் பெற்றவன், மிகவும் கூரிய புத்தியை உடையவன், ஸ்ரீராமனின் பணிக்காக எப்போதும் மகிழ்ச்சியுடன் காத்திருப்பவன்.

8. ப்ரபு சரித்ர ஸுனிபே கோ ரஸியா ராம லக்ஷமண ஸுதா மன பஸியா

இறைவன் திருப்புகழையும் பெருமையையும் கேட்பதில் நீ எப்போதும் பரவசம் கொள்கிறாய். ஸ்ரீராமனும் லட்சுமணனும் சீதையும் உனது மனத்தில் குடியிருக்கின்றனர்.

9. ஸூக்ஷ்ம ரூபதரி ஸியஹிம் திக்காவா விகட ரூப தரி லங்க ஜராவா

நீ மிகவும் நுண்ணிய உருவில் சீதையின் முன் வெளிப்பட்டாய், மிகவும் பயங்கார உருக்கொண்டு இலங்கையைக் கொளுத்தினாய்.

10. பீம ரூபதரி அஸுர ஸம்ஹாரே ராமசந்த்ர கே காஜ் ஸவாரே

மிகவும் பெரிய உருவம் கொண்டு அரக்கர்களை அழித்து ஸ்ரீராம காரியத்தை நிறைவேற்றினாய்.

11. லாய ஸஜீவன் லஷன ஜியாயே ஸ்ரீ ரகுவீர ஹரஷி உர லாயே

சஞ்சீவினி மூலிகையைக் கொண்டு வந்து லட்சுமணனின் உயிரைக் காத்த போது ஸ்ரீராமன் உன்னை எத்தனை ஆனந்தத்துடன் தழுவிக் கொண்டார்!

12. ரகுபதி கீனி பஹுத் படாயீ தும் மம ப்ரிய ஹி பரதஸம பாயீ

ஸ்ரீராமன் உனது பெருமைகளை மிகவும் புகழ்ந்து, நீயும் பரதனைப் போலவே தமக்குப் பிரியமானவன் என்று கூறியருளினார்.

13. ஸஹஸ வதன தும்ஹரோ யச காவைம் அஸ கஹி ஸ்ரீபதி கண்ட லகாவைம்

ஆயிரம் தலைகள் கொண்ட ஆதிசேஷன் கூட உனது பெருமைகளைப் புகழ்வதாக ஸ்ரீராமன் உன்னை அணைத்தபடியே கூறினார்.

14. ஸனகாதிக ப்ரஹ்மாதி முனீசா நாரத சாரத ஸஹித அஹீசா

ஸனகர் முதலான முனிவர்கள், பிரம்மா போன்ற தேவர்கள், சிவபெருமான், நாரதர், கலைமகள், ஆதிசேஷன் .

15. யம குபேர திகபால ஜஹாம் தே கவி கோவித கஹி ஸகைம் கஹாம் தே

எமன், குபேரன், திரைக் காவலர்கள், கவிஞர்கள், புலவர்கள், எல்லோரும் உனது பெருமைகளை விளக்க முயன்று தோல்வியே கண்டார்கள்.

16. தும் உபகார ஸுக்ரீ வஹிம் கீன்ஹா ராம மிலாய ராஜபத தீன்ஹா

ஸ்ரீராமனிடம் அறிமுகப்படுத்தி, சொந்த அரசை மீட்டுக்கொடுத்ததன் மூலம் நீ சுக்ரீவனுக்கு ஓர் இணையற்ற உதவியைச் செய்து விட்டாய்.

17. தும்ஹரோ மந்த்ர விபீஷண மானா லங்கேச்வர பயே ஸப் ஜக ஜானா

உனது அறிவுரைகளின்படி நடந்ததாலேயே விபீஷணன் இலங்கை அரசனானான் என்பது உலகம் முழுவதும் தெரிந்த விஷயம்.

18. யுக ஸஹஸ்ர யோஜன பர பானூ லீல்யோ தாஹி மதுர பல ஜானூ

பதினாறாயிரம் மைல்களுக்கு அப்பாலிருந்த சூரியனை, கனியென எண்ணி நீ விழுங்கிவிட்டாய்.

19. ப்ரபு முத்ரிகா மேலி முக மாஹீம் ஜலதி லாந்தி கயே அசரஜ் நாஹீம்

ஸ்ரீராமனின் முத்திரை மோதிரத்தை வாயில் தங்கியபடியே நீ கடலைக் கடந்துவிட்டாய். (உனது அளப்பரிய ஆற்றல்களைக் கணக்கிடும் போது) இது ஒன்றும் வியப்பிற்குரியதல்ல.

20. துர்கம காஜ் ஜகத் கே ஜேதே ஸுகம அனுக்ரஹ தும்ஹரே தேதே

எத்தனைக் கடினமான செயலும் உனதருளால் எளிதல் நிறைவேறிவிடும்.

21. ராம துவாரே தும் ரக்வாரே ஹோத ந ஆஜ்ஞா பின பைஸாரே

ஸ்ரீராம ராஜ்யத்தின் வாயிற் காவலன் நீ. உனது அனுமதியின்றி அங்கு யாரும் நுழைய முடியாது.

22. ஸப் ஸுக லஹை தும்ஹாரீ ஸரனா தும் ரக்ஷக காஹூ கோ டர்னா

உன்னைச் சரணடைபவர்கள் எல்லா இன்பங்களையும் பெறுகின்றார்கள். நீ பாதுகாவலனாக இருக்கும் போது எதற்காகப் பயப்பட வேண்டும்

23. ஆபன் தேஜ் ஸம்ஹாரௌ ஆபை தீனோம் லோக ஹாங்க்தே காம்பை

உனது ஆற்றலைக் கட்டுபடுத்த உன்னால் மட்டுமே முடியும். உனது ஆற்றலின் முன் மூன்று உலகங்களும் நடுங்குகின்றன.

24. பூத பிசாச நிகட நஹிம் ஆவை மஹாவீர ஜப் நாம ஸுனாவை

மகாவீரன் என்னும் உனது திருநாமத்தை இடைவிடாது கூறினால் நோய் அகல்கிறது, துன்பம் விலகுகிறது.

25. நாசை ரோக் ஹரை ஸப் பீரா ஜபத நிரந்தர ஹனுமத் வீரா

உனது ஆற்றல் மிக்கத் திருநாமத்தை இடைவிடாது கூறினால் நோய் அகல்கிறது துன்பம் விலகுகின்றது. மனோ தைரியம் உண்டாகின்றது.

26. ஸங்கட ஸே ஹனுமான் சோடாவை மன க்ரம வசனத்யான ஜோ லாவை

மனம், வாக்கு, செயலால் அனுமனைத் தியானிக்கும் ஒருவனை, அவர் எல்லாத் துன்பங்களிலிருந்தும் விடுவிக்கிறார்.

27. ஸப் பர் ராம் தபஸ்வீ ராஜா தின்கே காஜ் ஸகல தும் ஸாஜா

தவம் புரிகின்ற பக்தர்களின் மேலான ஆசைகளை நிறைவேற்றுகின்ற ஸ்ரீராமனின் பணிகளை நீ நிறைவேற்றினாய்.

28. ஒளர் மனோரத ஜோ கோயி லாவை தாஸு அமித ஜீவன் பல பாவை

மேலும் பக்தனின் ஆசைகளை நிறைவேறுவதுடன் அவன் அழியாக்கனியாகிய இறையனுபூபதியையும் பெறுகிறான்.

29. சாரஹு யுக பரதாப தும்ஹாரா ஹை பரஸித்த ஜகத உஜியாரா

சத்திய, திரேதா, துவாபர, கலி என்னும் நான்கு யுகங்களிலும் உனது பெருமை போற்றப்படுகிறது. உனது திருநாமம் உலகம் முழுவதும் சிறக்கிறது.

30. ஸாது ஸந்த கே தும் ரக்வாரே அஸுர நிகந்தன ராம துலாரே

நல்லோரையும் ஞானியரையும் நீயே காக்கிறாய். ஸ்ரீராமனின் மனத்துக்கு உகந்தவனான நீயே தீய சக்திகளை அழிக்கிறாய்.

31. அஷ்ட ஸித்தி நவ நிதி கே தாதா அஸ் வர தீன் ஜானகீ மாதா

எட்டுவித சித்திகளையும் ஒன்பதுவிதச் செல்வங்களையும் கேட்பவருக்கு அளிக்கம் ஆற்றலை சீதா தேவி உனக்கு அருளினாள்.

எட்டுவித சித்திகள்:

1. அணிமா-அணு போலாதல் 2. மஹிமா-எல்லையற்று எடை உடையவராதல்              3. கரிமா-எல்லையற்ற எடை உடையவராதல் 4. லகிமா-எடையே இல்லாது போலாதல் 5. ப்ராப்தி-நினைத்த இடத்திற்குச் செல்ல முடிதல் 6. ப்ரகாம்யம்-விரும்பியது கைகூடல் 7. ஈசித்வம்-இறைவனைப் போலாதல் 8. வசித்வம்-அனைவரையும் அடக்கி ஆளுதல்

ஒன்பது விதச் செல்வங்கள் ஒன்பது வகை பக்தியைக் குறிக்கிறது.

32. ராம் ரஸாயள தும்ஹரே பாஸா ஸதா ரஹெள ரகுபதி கே தாஸா

ஸ்ரீராம பக்தி என்பதன் சாரமே உன்னிடம் உள்ளது. எப்போதும் நீ அவரது சேவகனாகவே இருப்பாய்.

33. தும்ஹரே பஜன் ராம்கோ பாவை ஜன்ம ஜன்ம கே துக்க பிஸராவை

உன்னிடம் பக்தி கொள்வதால் ஒருவன் ஸ்ரீராமனை அடைகிறான். எத்தனையோ பிறவிகளில் தொடர்ந்து வந்த துன்பங்கள் அவனை விட்டு அகல்கின்றன.

34. அந்த கால ரகுபதி புர ஜாயீ ஜஹாம் ஜன்மி ஹரிபக்த கஹாயீ

அவன் தன் வாழ்வின் முடிவில் ஸ்ரீராமனின் உறைவிடம் செல்கிறான். அங்கு அவன் ஹரி பக்தனாக மதிக்கப்படுகிறான்.

35. ஒளர் தேவதா சித்த ந தரயீ ஹனுமத் ஸேயி ஸர்வ ஸுக கரயீ

அனுமனைத் தவிர வேறு எந்தத் தெய்வத்திடமும் மனத்தைச் செலுத்தாத ஒருவனுக்கும் எல்லா இன்பங்களும் நிறைகின்றன.

36. ஸங்கட ஹரை மிடை ஸப் பீரா ஜோ ஸுமிரை ஹனுமத பல பீரா

எல்லாம் வல்ல ஆஞ்சநேயரை நினைப்பவரின் துன்பங்களும் துயரங்களும் விலகி ஓடுகின்றன.

37. ஜய் ஜய் ஜய் ஹனுமான் கோஸாயீ க்ருபா கரஹு குருதேவ கீ நாயீ

ஓ ஆஞ்சநேயா, உனக்கு வெற்றி, வெற்றி, வெற்றி உண்டாகட்டும். ஓ பரம குருவே, எங்களுக்கு அருள்புரிவீர்களாக.

38. ஜோ சத பார் பாட கர ஜோயீ சூடஹி பந்தி மஹாஸுக ஹோயீ

இந்தத் துதிகளை நூறு முறை பக்தியுடன் படிப்பவர்களுக்கு உலகத்தளைகள் எல்லாம் நீங்கப் பெற்று பரமானந்தத்தை அனுபவிக்கின்றனர்.

39. ஜோ யஹ் படை ஹனுமான் சாலீஸா ஹோய் ஸித்தி ஸாகீ கௌரீஸா

இந்த ஹனுமான் சாலீஸாவைப் படிப்பவர்களுக்கு சிவபெருமான் அருள் புரிகிறார் அவன் பரிபூரண நிலையை அடைகின்றனர்.

40. துளஸீதாஸ ஸதா ஹரி சேரா கீஜை நாத ஹ்ருதய மஹ டேரா

என்றென்றும் தம் இதயத்தில் இறைவன் எழுந்தருளி வாழட்டும் என்று அவரது நித்திய சேவகனான துளஸுதாசன் பிரார்த்திக்கிறான்.

பவன தனய ஸங்கட ஹரன், மங்கள மூரதி ரூப ராமலஷமன் ஸீதா ஸஹித ஹ்ருதய பஸஹு ஸுரபூப

துன்பங்களைப் போக்குபவனுக்கு மங்கள உருவினனும் தேவர்களின் தலைவனும் வாயு மைந்தனும் ஆகிய ஸ்ரீ ஆஞ்சநேயர் எனது இதயத்தில் ஸ்ரீராம லட்சுமண சீதையுடன் நிலவட்டும்.

நன்றி: ஸ்ரீ வன்னி விநாயகர் புத்தக நிலையம், மீனாட்சி அம்மன் கோயில், மதுரை.

தண்டபாணி மூர்த்தி பதிகம்

Posted on

(சிரவையாதீனம் இரண்டாம் குருமகாசந்நிதானம்
தவத்திரு கந்தசாமி சுவாமிகள் அருளியது)

காப்பு வெண்பா

சீல நிறைவார் சிரவணந கர்க் கணிசை
கோல தண்ட பாணிக் குருபரன்றோண் – மேலமையச்
சூட்டும் பதிகத் துணையாகுந் தொண்டர்திருத்
தாட்டுணையிற் றோய்மகரந் தம்.

நூல் – எண்சீர் விருத்தங்கள்

1. வரம்பொலிபுன் முறுவலணிச் செவ்வாயுங் கருணை
மழைவிழியுந் திகழ்காமர் வதனமுஞ்செங் கடம்பா
ருரம்பொலிவை வேற்படையுந் தண்டமுடன் றொடைமீ
துற்றதிருக் கரங்களும்பண் பெற்றவரு மறையின்
சிரம்பொலிமோ லியிலிசைபொற் பங்கயத்தாள் களுமென்
சிந்தைவிழிப் பாலமைந்து திகழவைத்தாண் டருள்வாய்
குரம்பொலிமா விசைமறுகார் சிரவைநகர்க் கோயில்
கொண்டதண்ட பாணியருட் குமரகுரு பரனே.

2. அவிவிருந்தா ரமரர்கட்கு மாயுள்வரம் பொழியு
மவிவிருந்த தெனக்கலைக ளளவுணர்த்து மென்னிற்
புவிவிருந்தா மாக்கைபெறும் போக்கையொரு பொருளாப்
புகன்றிடவிங் கென்னுளதுன் புகழ்பரந்து சிறந்த
கவிவிருந்தா னந்தமதைச் செவிமதகுட் செலுத்திக்
கருத்தமைக்குந் தவஞானக் கண்ணியற்கண் ணியருட்
குவிவிருந்தாங் காட்சிநல்காய் சிரவைநகர்க் கோயில்
கொண்டதண்ட பாணியருட் குமரகுரு பரனே.

3. தத்தமது கன்மமுற்றும் விளைவாய்ப்பின் பயனைத்
தந்திடுதன் முக்காலுஞ் சத்தியமென் றுணர்ந்தும்
பித்தமதா லோமாயா மயக்காலோ கன்மப்
பிணிப்பாலோ வெதனாலோ பெரும்பாவம் புரியச்
சித்தமமைந் தனரவருட் சேர்ந்தயரா துண்மைச்
சிறப்புறுகௌ மாரர்தம்மு ளுறப்புரிவாய் வாசக்
கொத்தமர்பூங் கடம்புரத்தாய் சிரவைநகர்க் கோயில்
கொண்டதண்ட பாணியருட் குமரகுரு பரனே.

4. ஆலமெலாந் திரண்டுருண்டோர் மானிடமாய்ப் புவிமீ
தடைந்ததென மயக்கெவர்க்கு மளித்துமக மாயா
சாலமெலாம் புரிந்துகொடும் பாவியென நாமந்
தாங்கிமடிந் திடத்துணிவார் தம்முறவால் வீணே
காலமெலாங் கழித்தயர்ந்துன் கழற்கபய மானேன்
கடைக்கணருள் சுரந்தருண்மெய்க்கௌமாரர் பாற்றோய்
கோலமெலாங் கொடுத்தருள்வாய் சிரவைநகர்க் கோயில்
கொண்டதண்ட பாணியருட் குமரகுரு பரனே.

5. இச்சையற்றோ ரேபெரியோ ரென்றுணர்ந்தும் புவிமீ
தெவைகளையு மென்னுடைய தென்றிடவே திரிந்து
மிச்சைமனப் பேயாட்டச் சதமெனவே நம்பும்
வெண்மையறி வுடையேனுள் ளுண்மையுணர் வடையப்
பச்சைமயிற் பரிமிசையாங் காட்சியளித் துன்பொற்
பாதமலரென் சிரத்தின் மீதமைத்தாண்ட ருள்வாய்
கொச்சைநக ரென்னவணிச் சிரவைநகர்க் கோயில்
கொண்டதண்ட பாணியருட் குமரகுரு பரனே.

6. நிணம்பொருந்துந் தூலவுட லிங்கிதுகொண் டெய்தும்
நித்தியத்தோ டனித்தியந்தேர் நினைவமையேன் றுத்திப்
பணம் பொருந்து மரவினைவாய்க் கௌவிமிதித் தகவும்
பச்சைமயில் பெற்றமைமெய்ப் பண்பறியே னதன்மேல்
மணம்பொருந்தி யவிர்தருநின் றாட்டுணைகன் டதனுள்
வயங்கிடுநின் மெஞ்ஞான மயமறிந்துய் குவனோ
குணம்பொருந்து மன்பர்தொழச் சிரவைநகர்க் கோயில்
கொண்டதண்ட பாணியருட் குமரகுரு பரனே.

7. கீரனைத்துன் புறப்பிடித்த பேய்வரையி னோடுங்
கெடவடிவேற் படைவிடுத்த கிருபைமகோ ததியே
பாரனைத்து மெனையலைக்கு மலமாயா கன்மப்
பகையொழித்துத் திருநெடுமால் பண்ணவர்கட் கோதுஞ்
சீரனைத்தும் பலபடவே விதந்துவியந் தேத்திச்
சித்தாடல் புரிந்தாவித் திரள்களின்றுன் பொழித்துட்
கோரனைத்துங் கொடுக்கவருள் சிரவைநகர்க் கோயில்
கொண்டதண்ட பாணியருட் குமரகுரு பரனே.

8. மானந்த விழிமாதர் தங்காதன் மோக
வாரிகடந் துற்ற தமிழ் வாரிதியப் பாலா
ரானந்தக் கடலாடி யான்றானென் றிடல்போ
மருணகிரி நாதன்விழி யருந்தும்விருந் தாகும்
வானந்த வருட்சோதி மயத்திருத்தாண் முடிமேல்
வைப்பாய் நாயேனெய்ப்பில் வைப்பாய்வாழ் வுறவே
கூனந்தன் மதிச்சிகரிச் சிரவைநகர்க் கோயில்
கொண்டதண்ட பாணியருட் குமரகுரு பரனே.

9. ஆன்மாவிற் சிறந்துளதா முரிமையுளத் துணர்ந்துள்
ளணிபொலிநாட் டமைந்து றுந்தம் மவயச்சீ ருணரார்
கான்மாவிற் பற்பலுயிர் கொன்றுநிண மென்பு
கறித்துழல்வார்த் திருத்துசித்திக் கணமெனக்கீந் தருள்வாய்
தேன்மாவிற் கலந்திடுமென் னம்மைகலந் தின்பந்
திளைக்குமணி மார்பிடத்திற் சிறக்குமருணை கொளெங்
கோன்மாவிற் பனத்துதியாய் சிரவைநகர்க் கோயில்
கொண்டதண்ட பாணியருட் குமரகுரு பரனே.

10. ஞாலப்போக் கினிலலைந்து பொன்றேடித் தருக்கு
நரர்பொருளா மதியாதே நகைத்திகழும் படியோர்
காலப்போக் கினிலுனது பணிபுரியுங் தொண்டர்
கணங்களிப்ப வொருதாய்போற் காணுமட்ட சித்திச்
சீலப்போக் கினனையளித் திக்கலிகா லத்தின்
றிருக்கினைப்பொய்த் தருக்கினைப்புன் செருக்கினைமாய்த் தின்பக்
கோலப்போக் கினையருள்வாய் சிரவைநகர்க் கோயில்
கொண்டதண்ட பாணியருட் குமரகுரு பரனே.

11. வண்டாடுங் குழல்வள்ளி தெய்வானைக் கின்பார்
மணவாளா நின்றிருத்தாண் மணக்குமலை முற்றுந்
தொண்டாடுங் கௌமாரர் சூழவணைந் தன்பாற்
சுவைத்துதிப்பா மாலையினஞ் சூட்டிநின்மெய்க் கோலங்
சுண்டாடும் வரமளிக்க நினதுதிரு வுள்ளங்
கனிந்திரங்கி யருள்புரியுங் காலமெதோ திடுவாய்
கொண்டாடுந் தவர்க்கருள்வான் சிரவைநகர்க் கோயில்
கொண்டதண்ட பாணியருட் குமரகுரு பரனே.

12. மலவிருளை நீக்கவருண் மலயமுனி கலையாய்
வந்தவிரா மானந்த வள்ளலென வுள்ளங்
குலவியிசை யணிபொருந்துஞ் சிரவைநகர்க் கோயில்
கொண்டதண்ட பாணியருட் குமரகுரு பரனை
யிலவிதழார் கலவிமய லொழிந்தகவு மார
ரிணைப்பாதத் துகள்கொள்கந்த சாமிதுதித் தணிபா
நிலவியவா யுடையவர்சே யுடையதிருப் பாத
நீழலிலெந் நாளுமின்பாய் வாழவல்லார் நிசமே.

கனகதாரா ஸ்தோத்ரம் (தமிழில்)

Posted on

ஏழை தம்பதிக்கு திருமகள் அருள் செய்யும்படி ஆதிசங்கரர் பாடியருளியது கனகதாரா ஸ்தோத்ரம். அவர் அதைப் பாடியதும் பொன் மாரிப் பொழிந்தாள் அலைமகள். அற்புதமான அந்தப் பாடலின் கருத்துகள் மிளிர, தமிழில் பாடி அலைமகளைத் துதிப்பது, இன்னும் மகிழ்ச்சி அல்லவா? பொன்மழைப் பொழிக எனும் பாடல் வரலட்சுமி விரத நாளில் இப்பாடலைப் பாடி, திருமகளை வழிபட்டு வரம் பெறுவோம்.

தங்கநிற வண்டுமொய்க்கும் முகுளமலர் போலே
மங்கலமாம் திருமகள்நீ மார்பில்உள்ள தாலே
பொங்குகின்ற மகிழ்ச்சியினால் பொலிகின்றார் மாலே
பங்கயமே! அப்பார்வை படவேண்டும் மேலே!

நீலமலர் மேலமரும் தும்பிகளைப் போன்றே
நின்விழிகள் மாதவன்மேல்! நிலவுவதும் சான்றே!
காலமெலாம் பூத்திருக்கும் கண்மலரால் கண்டு
கருணைதந்தால் கடையனுக்கும் வெற்றி இங்கே உண்டு!

தேவருல காளுகின்ற தேவேந்தரப் பதவி
திருமகளே ஒரு நொடிஉன் விழிசெய்யும் உதவி!
மேவுகின்ற கருமணியின் நிழல்பட்டால் போதும்!
மேதினியின் வளமனைத்தும் என்னிடத்தில் மோதும்!

கணவனிடம் பதிந்திருக்கும் கண்மணியைக் கொஞ்சம்
காட்டுகநீ! அடியனிடம் கனகங்கள் கொஞ்சும்!
அனைவருக்கும் சகலசெல்வ அநுபோகம் தருவாய்!
அலைவீசும் பாற்கடலின் அமுதுடனே வருவாய்!

கார்வண்ணன் மேனிதவழ் கௌஸ்துபமே போல
கண்மணிகள் கொண்டவளே! முகுந்தனவன் நீல
மார்பினிலே திகழ்பவளே! மங்கலமே பெருக
மனைவிளங்க வயல்செழிக்க மழைவளமே தருக!

மதுகைட பரை அழித்த மன்னவனின் மேனி
மதுகையுடன் தழுவுகின்ற தேவிஇங்கு வாநீ!
பதுமத்தில் உறைபவளே! பிருகுவம்சச் சேயே!
படவேண்டும் பார்வைமலர்! என்மீது தாயே!

மன்மதனும் உன்னழகைப் பாணமெனக் கொண்டே
மாலவனை வெற்றிகொண்ட கதையுமிங்கு உண்டே!
உன்மோகப் பார்வைக்கே இணை எதுதான் சொல்ல!
உன் செல்வப் படைவேண்டும் இவ்வுலகை வெல்ல!

நீருண்ட மேகமென நிலவுகின்ற நயனம்
நிலைபெற்றால் சுகம்பெறுமே என்வாழ்வுப் பயணம்!
நாரணரின் உயிரமுத நாயகியே வாழ்க!
நாடுகின்ற பக்தன் எனை நலமனைத்தும் சூழ்க!

முக்தியினை எட்டும்என்றன் முயற்சிஎன்ன எளிதா?
முதல்விஉன்றன் அருளிருக்க விதியும்என்ன லலிதா?
சக்தியே! உன் சந்நிதியில் சரணம் சொல்லு கின்றேன்!
தாயே! உன் கருணையினால் மரணம் வெல்லு கின்றேன்!

காப்பதுவும், அழிப்பதுவும், படைப்பதுவும் நீயே!
கலைமகளே! அலைமகளே! மலைமகளே! தாயே!
வாய்ப்புற்றேன் திருமகளே வாக்கெடுத்துப் போற்ற!
வரந்தருவாய்! அடியவனின் ஊழ்வினையை மாற்ற!

வேதத்தின் விழுப்பொருளே! வித்திற்கும் வித்தே!
வீற்றிருக்கும் தாமரையே விளங்கவைக்கும் முத்தே!
நாதத்தின் உள்ளிருக்கும் நற்கனலே! தேவி!
நானிலமே செழித்திடுக! உன்னருள்தான் மேவி!

தாமரைமேல் காட்சிதரும் மாமறையே போற்றி!
சந்திரனின் உடன்பிறந்த சகோதரியே போற்றி!
தேன்மலரும் திருவடியில் தேவர்களே தஞ்சம்!
தேவிஉன்றன் ஆசிபெற்றால் திசையனைத்தும் மஞ்சம்!

வேங்கடவன் மார்பினிலே நீங்கிடாது வாழும்
வித்தகியே உன்புகழே விரிஉலகம் ஏழும்!
நாங்களெல்லாம் வாழ அருள் நல்லபடி செய்க!
நற்கரத்தால் நவநிதியம் நாளும்நாளும் பெய்க!

வையத்தைக் காக்கின்ற வரதராஜர் துணையே!
மண்டலத்தில் உன்கருணை மழைக்குஏது இணையே!
செய்யமலர் திருவடியைத் தினமும்பற்று கின்றேன்!
செயலனைத்தும் ஈடேறிச் சிறக்க வெற்றி கண்டேன்!

வேண்டுவார்க்கு வேண்டுவதை அருளுகின்ற தாயே!
மேன்மையளே! உன்பெருமை விளக்கிடுமோ வாயே!
தூண்டுசுடர் போன்ற ஜோதி துலங்குமுகம் கொண்டாய்!
தூய பிருகு வம்சத்தின் தோன்றலென நின்றாய்!

அறுகம்புல் ஆலமரம் ஆக்கும்உன்றன் சக்தி!
அண்டாண்ட கோடிஉயிர் உன்னருளால் முக்தி!
அரியணையாம் கமலத்தில் அரசிருக்கும் திருவே!
அவனிபெறும் வளர்ச்சியெல்லாம் உன்பார்வை விரிவே!

முகுந்தனுடை இன்னுயிரே! உலகின்மூலப் பொருளே!
முதன்மையாக எதையும் ஆக்கும் புதுமை உன்றன் அருளே!
புகழுகின்றேன் மனம்வாக்கு காயத்தால் உன்னை!
பூவுலகம் பொலிவுபெற பொழிந்திடுக பொன்னை!

பங்கயத்தில் பங்குபெறும் பகவதிஉன் நாமம்
பகர்பவர்க்கு இவ்வுலகில் நிகரிலாத க்ஷேமம்!
மங்கலங்கள் அனைத்திற்கும் நீதானே மூலம்!
மாளிகைகள் மண்டபங்கள் உன்கையின் ஜாலம்!

பொன்மகளே நன்றாய்நீ புனலாட வேண்டி
போதகமாம் யானையெலாம் பொங்குகங்கை ஏந்தி
முன்வந்தே அணிவகுக்கும் காட்சியினைப் பார்த்தே
முன்னவனும் மயங்குகிறான் உன்னழகில் ஆர்த்தே!

கருணைஅலை பெருகும்உன் கடைக்கண்ணைச் சிறிது
காட்டிவிடில் என்வறுமை நிற்பதென்ப தரிது!
வறியவனில் முதல்வன்நான்! அதனால்உன் அருளை
வாங்குவதற்கே உரியவன்நான்! ஓட்டுக என் இருளை!

தேவரென பூமியிலே யாவருமே போற்ற
சிறந்திடலாம் இத்துதியைத் தினந்தோறும் சாற்றா!
மூவுலகும் காக்க மகா லக்ஷ்மியினைத் துதிப்போம்!
முதன்மைபெற முதல்விபதம் இதயமதில் பதிப்போம்!

ராமநாம ஞானம்

Posted on

நன்மையுண்மை வீரமீரம் உருவவெடுத்தால் யாரடா?
நான்கு வேதம் காட்டுகின்ற பிரம்மமது ஏதடா?
தாரகமாய் ஆகுகின்ற பேருமெது பாரடா
ராமராம ராமராம ராமவென்று தேரடா

நேர்மையும் அளித்திடும் நீதியும் அளித்திடும்
தீமையை எதிர்த்திடும் வீரமும் அளித்திடும்
தீயவரை வெறுத்திடா குணமதும் கொடுத்திடும்
ராமராம ராமராம ராமவென்ற நாமமே

வென்ற நாமம் ஏதடா? வெல்லும் நாமம் ஏதடா?
வெள்ளையனை விரட்டியவர் சொன்ன நாமம் ஏதடா?
வெள்ளையுள்ளம் தந்திடும் நாமமெது தேரடா
ராமராம ராமராம ராமவென்று கூறடா

ராமராம ராமராம ராமவென்று கூறடா
தொட்டசெயல் அத்தனையில் வெற்றிபெற்று வாழடா
ராமராம ராமராம ராமவென்று கூறடா
தொட்டதெல்லாம் வெற்றியாகி வெற்றிவாகை சூடடா

ராமராம ராமராம ராமவென்று கூறடா
திண்மையுடல் மென்மைகுணம் கொண்டு மண்ணில் வாழடா
மனநோயும் அற்றிடும் உடல்நோயும் அற்றிடும்
ராமராம ராமராம ராமவென்று கூறடா

நல்லவனாய் வாழவும் யோகம் வேணும் காணடா
சத்தியனாய் வாழவும் யோகம் வேணும் காணடா
செல்வனாக வாழ்வும் யோகம் வேணும் காணடா
யோகம் கொள்ள ராமராம ராமவென்று கூறடா

ராமராம ராமராம ராமவென்று கூறுவோன்
ராமராம ராமராம ராமர்போல ஆகுவான்
ராமராம ராமராம ராமர்போல ஆனபின்
ராமராம புண்ணியமாம் கிருஷ்ணராவும் ஆகுவான்

கிருஷ்ணர்போல ஆவதும் கசக்குமோ குலாமரே
லட்டுதின்ன ஆசைகொண்ட கலியுகக் குலாமரே

மெய்வலிமை தந்திடும் மெய்ஞானம் தந்திடும்
மெய்யான தெய்வத்தை கண்முன்னும் தந்திடும்
மெய்மறைக்கும் பொய்களை அறுத்திடும் அறுத்திடும்
மெய்யதான ராமராம ராமவென்ற நாமமே

விபத்துகள் தடுத்திடும் சூனியம் முறித்திடும்
வினைகளில் தீயதை விரட்டியும் அடித்திடும்
தவறுகள் செய்வதை தடுத்திடும் திருத்திடும்
நன்மைசெய்ய வைத்திடும் ராம ராமராம நாமமே

ஓம்நமோநாராயணாய!!

தர்ம சாஸ்தா ஸ்துதி தசகம்

Posted on

ஆசானுரூப பலதம் சரணாரவிந்த
பாஜாமபார கருணார்ணவ பூர்ண சந்த்ரம்
நாசாய ஸர்வ விபதாமபி நௌமி நித்ய-
மீசான கேசவ புவம் புவநைக நாதம்

தன் சரண கமலத்தை அடைந்தவர்களுக்கு விரும்பிய பயனை அளிப்பவரும், கரை இல்லாத கருணையாகிற கடலுக்கு முழு நிலவு போன்றவரும், ஹரிஹரபுத்திரரும், உலகங்களுக்கெல்லாம் ஒரே நாயகனாய் இருப்பவருமான ஸ்ரீசாஸ்தாவை எல்லாவித ஆபத்துக்களும் விலகுவதற்காக எப்போதும் நமஸ்கரிக்கிறேன்.

பிஞ்சாவலீ வலயிதா கலித ப்ரஸூன
ஸஞ்ஜாத காந்தி ப்ரபாஸுர கேசபாரம்
சிஞ்ஜான மஞ்ஜு மணிபூஷண ரஞ்ஜிதாங்கம்
சந்த்ராவதம்ஸ ஹரி நந்தனம் ஆச்ரயாமி

மயில் தோகையைச் சுற்றிலும் தொடுக்கப்பட்ட புஷ்பங்களிலிருந்து உண்டான ஒளிக் கற்றைகள் விளங்கும் கேசபாரத்தை உடையவரும், சப்திக்கின்ற அழகான ரத்ன ஆபரணங்களால் அலங்கரிக்கப்பட்டும் அங்கங்களை உடையவரும், சந்திரசேகரன் விஷ்ணு இவர்களின் புத்திரருமான சாஸ்தாவை வணங்குகிறேன்.

ஆலோல நீல லலிதாலக ஹார ரம்ய
மாகம்ர நாஸம் அருணாதரம் ஆயதாக்ஷம்
ஆலம்பனம் த்ரிஜகதாம் ப்ரமதாதிநாத
மானம்ர லோக ஹரி நந்தனம் ஆச்ரயாமி

கருத்து அழகிய கேசச்சுருள்கள் மாலைகளாக ஆடும் அழகு வாய்ந்தவரும், அழகான நாசியையுடையவரும், சிவந்த உதடுகளையும், நீண்ட கண்களையும் உடையவரும், மூவுலகிற்கும் ஆதாரமானவரும் சிவகணங்களுக்குத் தலைவனுமான ஹரிஹர புத்திரனை நமஸ்கரிக்கிறேன்.

கர்ணாவலம்பி மணிகுண்டல பாஸமான
கண்டஸ்த்தலம் ஸமுதிதானன புண்டரீகம்
அர்ணோஜநாப ஹரயோரிவ மூர்த்திமந்தம்
புண்யாதிரேகமிவ பூதபதிம் நமாமி

காதுகளில் தொங்கும் ரத்ன குண்டலங்களால் ஒளிரும் கன்னங்களை உடையவரும், பத்ம நாபன் மற்றும் சிவனின் புண்ணியமே திரண்டு உருவமெடுத்து வந்ததுபோல் விளங்குகிறவரும், பூதங்களுக்கு நாயகருமான சாஸ்தாவை நமஸ்கரிக்கிறேன்.

உத்தசண்டசாரு புஜ தண்ட யுகாக்ரஸமஸ்த
கோதண்டபாண மஹிதாந்தமதாந்த வீர்யம்
உத்யத் ப்ரபா படால தீப்ரமதப்ரஸாரம்
நித்யம் ப்ரபாபதிமஹம் ப்ரணதோ பவாமி

உயர்ந்தும் அழகியதுமான இரண்டு கைகளிலும் வில், அம்பு ஆகியவற்றை தரித்தவரும், சத்ருக்களை நாசம் செய்கிறவரும், அளவற்ற பராக்கிரமத்தை உடையவரும், மிக்க பலசாலியும், ஒளி மயமாக விளங்குகிறவரும், ஒளிக்கு இருப்பிடமுமான சாஸ்தாவை தினந்தோறும் நமஸ்கரிக்கின்றேன்.

மாலேயபங்க ஸமலங்க்ருத பாஸமான
தோரந்தராள தரளாமல ஹார ஜாலம்
நீலாதி நிர்மல துகூல தரம் முகுந்த
காலாந்தக ப்ரதிநிதிம் ப்ரணதோஸஸ்மி நித்யம்

மலய பர்வதத்தில் உண்டான சந்தனத்தால் அலங்கரிக்கப்பட்டுப் பிரகாசிக்கின்ற மார்பில் ஆடுகின்ற மாலைகளை உடையவரும், பரிசுத்தமான நீல வண்ணப்பட்டு வஸ்திரத்தை அணிந்திருப்பவரும், விஷ்ணுவுக்கும் பரமேஸ்வரனுக்கும், பிரதிநிதியாக விளங்குகிறவருமான சாஸ்தாவை எப்பொழுதும் வணங்குகிறேன்.

யத்பாத பங்கஜயுகம் முனயோஸப்யஜஸ்ர
பக்த்யா பஜந்தி பவரோக நிவாரணாய
புத்ரம் புராந்தக முராந்தகயோருதாரம்
நித்யம் நமாம்யஹமமித்ர குலாந்தகம் தம்

மஹரிஷிகள், சம்சாரமாகிற நோயின் நிவர்த்திக்காக இடைவிடாத பக்தியுடன் பாத கமலங்களை பஜிக்கும் தெய்வமாகவும் சிவன் விஷ்ணு இவர்களுடைய புத்திரரும், உதார குணம் உள்ளவரும், சத்ருக் கூட்டங்களுக்கு எமனாக இருப்பவருமான அந்த சாஸ்தாவை நமஸ்கரிக்கின்றேன்.

காந்தம் கலாய குஸுமத்யுதி லோபனீய-
காந்தி ப்ரவாஹ விலஸத் கமனீய ரூபம்
காந்தா தநூஜ ஸஹிதம் நிகிலாமயௌக
சாந்தி ப்ரதம் ப்ரமத நாதமஹம் நமாமி

மிக அழகு வாய்ந்தவரும், காயாம்பூ போன்று மனதைக் கவரும் ஒளிப்பிரவாகமாக விளங்கும் அழகிய உருவத்தை உடையவரும், மனைவி, புத்திரர் இவர்களுடன் கூடியவரும், சகல வியாதிகளையும் போக்குபவரும், முக்கிய கணங்களுக்கு நாயகனுமான சாஸ்தாவை நமஸ்கரிக்கிறேன்.

பூதேச பூரி கருணாம்ருதபூர பூர்ண-
வாராந்நிதே வரத பக்தஜனைக பந்தோ
பாயாத் பவான் ப்ரணதமேனம் அபாரகோ
ஸம்ஸார பீதமிஹமாம் அகிலாமயேப்ய:

ஓ, பூத நாயகனே, மிகுந்த கருணையாகிற அமிருதப் பிரவாகத்திற்கு ஸமுத்ரம் போன்றவரே, பக்தர்களின் விருப்பங்களைப் பூர்த்தி செய்பவரே, பக்தர்களுக்கு முக்கிய உறவாக இருப்பவரே, கரையற்றதும், மிகப் பயங்கரமானதுமான ஜனன மரண துக்கத்தால் மிகவும் பயந்தவனும், தங்களை நமஸ்கரிக்கின்றவனுமான என்னைத் தாங்கள் எல்லாவித வியாதிகளிலிருந்தும் காக்க வேண்டும்.

ஹே பூதநாத பகவன் பவதீயசாரு-
பாதாம்புஜே பவது பக்திரசஞ்சலாமே
நாதாய ஸர்வ ஜகதாம் பஜதாம் பவாப்தி
போதாத நித்யம் அகிலாங்க புவே நமஸ்தே
இதி ஸ்ரீ தர்மசாஸ்து: ஸ்துதி தசகம் ஸமாப்தம்

ஹே பூதத் தலைவனே, ஓ பகவானே, எனக்குத் தங்களது அழகிய பாத கமலங்களில் இடைவிடாத பக்தி ஏற்படட்டும். எல்லா உலகங்களுக்கும் நாதனும் தன்னை பூஜிக்கிறவர்கள் சம்ஸாரக்கடலைத் தாண்டுவதற்குக் கப்பலாக இருப்பவரும்; சூரியன், சந்திரன், வருணன், பூமி, அக்னி, ஸோமயாகம் செய்தவர்கள், வாயு, ஆகாசம்- இந்த எட்டுகளை சரீரமாகக் கொண்ட பரமேச்வரனின் குமாரனுமாகிய தங்களை தினமும் நமஸ்கரிக்கிறேன்.